究竟信仰係可以令人更自由，定係面對更多束縛？
有日有位姊妹忽然好心急咁打電話俾我話：「博士，忙唔忙呀？知你以前都攞過奬學金同有啲義工經驗，我咁啱個仔17歲，想去海外交流，申請個義工交流團，但係覺得冇乜信心，可唔可以過兩招俾佢呀……」跟住下刪300字，關於點樣望子成龍，上大學又要有社會服務經驗等⋯⋯
我一口答應：「可以嘅，但係要佢自己搵我喎！」姊妹又好擔心咁話：「吓，唔知佢敢唔敢喎，雖然識咗你十幾年，我驚佢會驚喎！」
會面發生喺年輕人最鍾意溫書嘅地方，sorry，梗唔係自修室啦，而係好自由任坐吹水嘅星巴克！以為咁樣嘅環境氣氛，佢會輕鬆啲，點知呢位年輕人緊張到無倫，因為隔離枱嗰啲少女們。我一開始就問佢點解要申請做義工海外交流？做乜要幫人？年輕人面有尷尬咁樣好細聲答我：「想做義工，幫有需要幫嘅人……」當佢答左一大堆標準嘅答案時，我心諗，果然係考試機器，標準答案一字不漏背出嚟！點解要進行面試？就係要睇下你個人嘅態度！心態決定一切！
為咗幫佢進行深切嘅腦震盪急救，於是乎我唯有再挖探啲，追問佢嘅夢想未來想做咩工作，咁同申請去海外義工交流和每個禮拜返主日學有無關係啊？
「想做律師。」好。咁係咩律師？事務律師定係大律師啊？「想打官司上庭嗰啲。」
點解啊？「因為可以維護公義。」
咁，你會唔會代表啲強姦犯或者醉酒駕駛撞死咗人嘅被告去出庭辯護？「唔想喎，但我知肯做，可能收好多錢。但幫被告先係爭取公義喎！」原來我哋真係俾九流嘅電視劇荼毒得好緊要！下一代完全完全唔明公義、法治嘅意義。咁深嘅！起碼都睇下前排湯漢斯套《換諜者》點解要為間諜上訴。
用「二分法」去看事物，往往係可以令人易明白，但人生唔係非黑即白，究竟係幫美國隊長定係幫九頭蛇嘅壊人？無深層分析力嘅結果，令好多人陷入無限期嘅思想軟禁！同樣，好多基督徒將自己嘅生活都二分咗係教會和工作，響主日講屬靈、愛主、榮神益人，而由細到大主日學、青年區都唔教理財和唔敢掂搵錢概念，將有啲工作例如社工，醫生、護士啦，賦予大大嘅意義，但當畢業生投身做賣保險賣基金賣樓經紀嘅話，就只有自己屬靈腦交戰，最後俾「魔鬼」區域經理，老闆mode咗，主日要返工搵客，一不做二不休，返唔到聚會，索性頭也不回離教去了！而弟兄們做生意、講投資，就最好唔好響教會講啦，因為呢啲係事奉瑪門！唉，原來好多人信咗耶穌，並無獲得真正自由，反而思想上加咗更加多重重嘅枷鎖！唔能夠坦然面對人性對物質慾望、生活所需嘅壓力、同埋財富金錢嘅真正意義！
當義工亦非一定有意義，搵錢達人哪有罪，地上一切豈會在上主之上！
按着恩賜，盡情展翅上騰，不要再軟禁自己了。
（原文刊登在115期《天使心》月刊內）
