世上無絕對好事和壞事，萬事是可以互相轉化的，在乎我們嘅心！
TEXT/ 黃兆輝專欄
前排全城熱話，億半六合彩金多寶！搞到大批市民又有幾日忙，公司同事夾份啦，排長龍都在所不計，男男女女熱切期待。天降橫財真係不少香港人的夢想，日常「穩定」的工作令好多人唔快樂，因為返份工既餓唔死亦肥唔到，日出而作日入而息，莫講人生理想，連工作動力都無埋……而買六合彩可算係全港最普及最透明的「暴發」方式。原來咁多年嚟，全世界都有過許多巨額嘅世紀彩票，不過只要翻開資料，當中好多得獎者一朝暴富後，胡亂揮霍，最後打回原形不特止，甚至妻離子散，破產收場，衰過舊時。
中咗一億又如何？
咁好彩成為幸運兒後，有人會樂於與人分享。好多打仔會話「聽日中咗六合彩，就唔鬼返工！」人人以為會馬上炒老闆魷魚及買豪宅，但有一對美國夫婦中咗15億，表示仍會繼續返工，以及仍然住響只值15萬美元嘅房子裏。而且，還準備拎部分出嚟捐給一座教堂及一家兒童醫院。有咁嘅平靜安穩EQ和善心，你估是發達前定係到手執巨彩先至有？！
首要保守你的心
相反，好多中獎者都未能好好「應付」意外之財，保持低調，不敢同任何人講，終日提心吊膽，甚至疑神疑鬼，講到尾，筆錢太突然了。亦有不少橫財「幸運兒」在暴發後，揮霍無度，沉迷享樂，最終坐食山崩。在英國便曾有一名英國年青人在2002年中了970萬英鎊大獎，一夜間變成了億萬富翁，故事發展當然是他開始購買豪宅名車，更染上了吸毒和嫖妓等惡習，僅僅8年時間便一貧如洗，最終仲要靠救濟金過活。情況同不少英超足球明星一樣，十八、九歲少年得志，周薪百萬，被傳媒捧上天！加上損友名模自然圍着轉，天天花天酒地，不懂自愛，疏於練習，狀態起伏不定，好快巨星殞落，浪得虛名。
禍與福
在台灣有一位大哥中了逾1000萬台幣彩金，因為不甘心只做千萬富翁，恃住自己食正個「運」，於是決定把錢押下去翻幾番，不足兩三年後，錢全花光，但卻再沒拎過一分一毫彩金！中國人對人生福禍有不少傳統智慧，如老子話「禍兮福之所倚，福兮禍之所伏」，大意是說禍與福互相依存，可以互相轉化。禍亦是造成福的前提，而福又含有禍的伏筆。也就是說，世上無絕對好事和壞事，萬事是可以互相轉化的，在乎我們嘅心！有時中頭獎未必等同好運降臨，也得看看你的心態，如何去活出恩賜、財富、生命，所以，假如你中巨獎一億，錢唔係問題，你會做乜？你覺得答唔到，正常喎，因為無，但要是你已經明白什麼是你真正生活目標、生存價值、喜樂嘅來源，你是不用等到有一億，你才思考如何運用你所有的時間和金錢！
（文章節錄自《天使心》，更詳細的精彩內容，請參閱121期《天使心》）按此訂閱《天使心》
