【黃兆輝專欄】貪婪與恐懼

20160421155758_82606

響香港,無乜人可以逃出資金遊戲,而資本增值最多嘅就係買樓賣樓,一出一入嘅資產改寫人生嘅故事,點解?好簡單,有幾多人會話屋企有寬闊空間?自己有一片土地農莊,生多咗個B,可擴建小屋呢?無可能啦!住屋係實際需求,而中國人傳統觀念下,會催啲後生結婚生仔。唔似鬼佬,細路大個咗就管不了。加上本來大部分香港屋企就係豆膶,於是人人都將上車買樓當成夢想,甚至係成功、傑出嘅象徵。今年就出咗位兩年供完樓嘅傑出青年,她說到買樓、銀、極速供滿樓…..滔滔不絕。可惜,如此「傑出」表現就梗係令人又愛又恨,卒之招來網絡起底,帶出各種是是非非,什麼同評審委員嘅關係、㔂選準則等…本欄就無興趣解讀,唯「買樓和人生成就感」,就值得解毒一下嘞。

講買樓,首先要講清楚目的先。好多人話係自住啫,唔係炒亦唔係要賺錢,無揸樓喎……嘩!睇開本欄嘅都知,唔會comment 啲「無樓啫但內心富足嘛」咁離地嘅論調。一講目標就唔清唔楚,難怪不少香港人響最唔應該嘅時候撲入市,因為好多人對現金流概念 (Cash Flow Concept)及投資意義嘅認知不足,現金流表示你能通過各種主動和被動收入或借貸足以應付支出,作出投資,而投資最基本概念是放棄即時享受,延續資產回報,他朝享受更多。

自住是剛性需求,除非你住響「廉租」公屋,否則,當你租住私樓,其實你和你一家正是不斷將每月的身家,無法累積兼送給另一家。好嘞,唔租就要諗買啦。可惜,大家常常話睇唔通樓市,但,正如我投資圈朋友湯博士話,與其話睇樓市,不如「聽」樓市……「因為睇樓市走勢其實是分析影響樓市的各種數據……不過,那些數據是過去式,即是首先要預測影響樓市的各項因素未來走勢,例如會不會加息、失業率是否會上升、供應量等,得出一個結論,再預測樓市未來走勢,如此轉轉折折,分析的準確大程度就會下降,所以,睇樓市不如聽樓市……其實,不需要太刻意,當大家聽唔到有人講樓市,表示樓市正在下跌。有樓業主已經損失慘重,講都唔想講樓市,沒有樓的人亦唔知道點樣講樓市,當樓市開始上升,就會有人問那些專家:「現在是不是買樓好時機?」以上正好反映大部分本來有置業需要嘅朋友,常常只想到唔夠首期,又怕上車後,生活享受大大下降。在淡市樓價低迷時,唔用心去思考家庭長遠目標,只見周圍都無人賺錢,「租住先啦,遲啲先算!」就係咁錯過低價入市,投資未來嘅時機。到個市慶烚烚,有啲朋友業主手上有錢賺,笑哈哈,加上依家發展商提供二按「助人」借到盡上車,將個單位細啲嚟「配合」你嘅最大承擔力,協助你置業安居達成傑出成就!

說話不可太盡,費事阻人買樓「發達」,但,唔識咩係被動收入、咩叫現金流操作,響香港生活都幾危險。咁重要?又唔見學校教?你問我,我問邊個?學校亦無乜教、教做人父母(parenting)咯,乜唔重要咩?最後,要駕馭金錢,先要克服貪婪和恐懼,而太陽底下無新事,先仰望耶和華,內心直正,爭取合理回報。

如對拙文有任何意見,歡迎到facebook專頁drbryanwong賜教。

(原文刊登在126期《天使心》內)