連埋特朗普都可以當選美國總統，加上之前李斯特城攞英超冠軍和英國脫歐(Brexit)，真係黑天鵝滿天飛，究竟係真正好難預測，抑或只係大家已經失去某啲能力呢？包括想像力和應變力！
由於自2008年金融海嘯後，美歐日及全球主要央行都推出QE放水，當年大家以為平錢可以托住個溶解中的金融市場兼推動經濟復甦。不過，8年過去，唔單止無推動經濟火車頭、提高就業率，反而因為長期零息，退休人士及平民百姓放錢入銀行無息收，而企業之間就利用平錢來大玩金融財技，上市公司不斷靠回購計劃來促使股價炒起，而毫無實質產業發展，加埋收購合併，裁去原有員工來節流，又話業積有改善嘞。
如是者在歐美大中企業不斷玩紙上富貴，股價創新高，高層及顧問在收購前後又大賺一筆，而大部分員工及普羅大眾卻無從分享，你話脫歐派和特朗普大打擺脫約制、推倒固有精英建制，政綱一味有咁大，吹咁大先，係咪大把市場啦！運動喎，奪權喎！反正成10年嚟，都咁半生不死，放手一搏啦！若果無從歷史中學習，不明白世界求變大趨勢，就梗係對今年立會結果又跌眼鏡啦。
政治上人人叫改變社會、改變規則，即使比過紅海、出埃及有更多未知數，仍大獲選票全勝！咁，各位你嘅生命呢？若果話：你來到呢個世界，生來就為榮耀，贏得勝利(born to win)，你信嗎？人人本來是平等？還是，你相信不平等？好醜命生成？
請回想你兩歲入托兒所，入playgroup時你充滿活力、充滿好奇心，敢去嘗試接觸每樣事物和人！很多人對你耳邊説No No No，這叫學識規矩，五歲時你響房內和最愛嘅公仔跳舞，大笑大叫，滿身大汗，連衫都除哂，好開心。你嘅世界充滿樂趣！突然，房門砰一聲，大門一開，媽咪鬧你：「係咪傻咗！」你感覺你要收起你嘅美好世界！六歲那次倒瀉牛奶麥皮，爸爸鬧咗你成朝：「你好論盡，你隻手係咪無用㗎？你上小學死梗！」你以後好憎D滑嘟嘟嘅麥皮！好嬲你隻手無用，唔再信任佢。夜晚見到媽咪仲鬧緊，因為你搞到佢今朝遲到，呢個月第二次啦，令你感到自己真係……
其實上帝愛每個人，大家生來本可赢得榮耀，但是由細到大，父母、老師、朋友、考試制度，好多掛着「為你好」的人令多少人孩童年代起，每天受着打擊批評，磨蝕至挫敗而不知！
循規蹈矩、安份守己、量力而為……等形容詞，令不少人面對轉行、轉型、回應呼召等決擇時刻，用作退縮嘅代用詞！猶豫不決嘅人，既一面埋怨緊，但又唔敢離開做咗好耐嘅工作，雖然知到嚟緊收入越來越少，生意漸淡，或感到呼召嘅時候，但點解大部分人仍無任何行動，食老本、「睇下點先啦！？Part time 先啦」去回應呢一個不斷轉變嘅現實？對好多港人，什麼Uber、AirBnB係分享型經濟，好難明白，好難接受添，因為好似話違法喎！網絡福音，香港唔得嘅！
所以，唔奇怪香港進入一種茫然政治局面，呆滯不前嘅經濟局面，甚至連傳福音嘅運動，都不似是一個集中西文化100年，什麼紐倫港、一帶一路嘅核心城市地位！你相信我們及我們下一代可以改變中國、改變世界嗎？首先，不是由怪誕胡閙嘅誓詞玩起，一定係由心底深處對人、對家對國嘅情操出發，愛，可以改變世界，為何不可？
撰文：黃兆輝博士
（原文刊登在127期《天使心》月刊內）
