【黃兆輝專欄】小確幸變大運動

siembra semilla_meitu_7

今天世界上無人見過主耶穌,但係見到嘅係代表着耶穌基督嘅基督徒,點樣去待人、有無用心交流傾計!

7月尾到高雄參加咗一個叫幸福小組嘅培訓營,相信《天使心》嘅讀者同埋創世電視嘅觀眾,都唔會對幸福小組太過陌生,事關影音使團響過去幾個月都有努力向本港嘅弟兄姊妹去介紹幸福小組,一個咁有「業績」嘅傳福音方法及形式。呢個真係一個非常之有果效嘅課程,大大改變人對傳福音概念,對任何一個基督徒來講,包括一直以為自己係「平信徒」、Small Potato嘅你,都真係一定要認真留意!

對好多基督徒來講,穩定聚會、工作積極、在職侍奉、無失見證,已經好好!但係呢種觀念,其實一方面同信仰唔係好大關係,只係我哋喺由細到大,在學校裏邊我哋被訓練、被人催眠、被人「教育」我哋成為一個循規蹈矩、平凡人、聽話工作的一個工人;偉人巨人彷彿是天生注定,和我們無關。而教會裏邊,亦不知從甚麼時候,創造出一個叫「平信徒」嘅身份出來,彷彿傳福音、為主做大事嘅,只有嗰啲被呼召、入神學院、全職去做一啲侍奉,才有傳福音使命,我哋平信徒乖乖地做好自己本份就算了,無錯,問題就是甚麼叫「本份」?原來我哋作為蒙恩得救嘅人,本份只有一個,就是為要傳福音開去,叫萬人作門徒!論你附加幾多解經註釋、其他愛心演繹,走不甩,我哋就是要交出呢個業績!

不應跑業績心態傳福音?

一提呢兩個字—業績,就好像很市儈、好被迫咁,但係其實當我哋去認真睇,呢一個代表咗我哋能夠最珍惜、最重要嘅數字背後,等於一個靈魂從地獄裏救出來嘅話,你一切成本也會付出!都唔會再係壓力,而係你嘅幸福泉源、喜樂之處!

甚麼是感動?

培訓會內最令我感動嘅係有關感動嘅演繹,「做不足是虧欠、剛剛好是應份、做過頭是感動」,其實有啲時候好簡單,我哋常常都話唔知點樣為之叫做感動,你試想下響一啲食品差、態度又衰嘅餐廳,你會唔會再去?去過日本見過優質嘅禮貌服務態度,你就會知道細嘅餐廳、好簡單嘅拉麵,吃着係一份誠意,因為人嘅態度,令到你會有感受!今天世界上無人見過主耶穌,但係見到嘅係代表着耶穌基督嘅基督徒,點樣去待人、有無用心交流傾計!係要傾到會喊,會流淚,因為生命係充滿激情、愛心,而不是平淡無可無不可地捱過。

「耶穌愛你」從天上而來?看不見、聽不到,惟有係從傳話嘅人的愛心分享而來!

日子如何,力量也如何,如果我哋只見到太多事工,有聚會,獨欠佈道激情,沒有感動,我哋亦隨之喪失呢份「救人」嘅特異功能!

傳福音好難,家人好友難,陌生人好易失敗?

其實講呢啲說話嘅人,佢哋做乜都難!傳福音路上,沒有失敗,只有放棄,是心態問題!當你看出價值有多少,就會願意付出多少,得生命,並且得的更豐盛!

借文悼念759林老闆,他為零售市場打破超市財團壟斷、顧及員工飯碗,他真的做過頭,做到了,感動了很多香港人!

如對拙文有任何意見,歡迎到facebook頁,drbryanwong賜教。

(文章節錄自《天使心》,想閱讀更詳細的精彩內容,請參閱148期《天使心》)按此訂閱《天使心》